絲絲講場：中芯梁孟松「蒲頭」股價即升

唔好以為梁孟松咁耐唔公開露面會有問必答，據聞梁孟松喺問答環節之前冇發過言，班分析員又巧合地居然完全冇人點名梁孟松答問題，亦冇特登提問關於先進製程或技術研發上嘅嘢，搞到呢位半導體行業嘅風雲人物成場冇戲唱。

算啦，等絲絲總結吓管理層嘅言論。首先關於先進製程方面，大致係應用平台同客戶都多，而且由於產能好細（呢個好重要），所以滿載。

產能方面呢，舊年擴產計劃超額完成，新增月產能達到10萬片以上（8吋等值晶圓‧下同），今年擴產速度介乎13萬至15萬片，12吋晶圓擴產會快過舊年好多，但絕大部分事前已經同客戶傾好，現時亦都同一啲大客簽咗長約，但唔會全部產能都簽，總會留番啲空間接客。由於設備交付周期拉長咗，擴產計劃可能遲啲先達產，公司會同供應商「保持戰略合作，努力按既定目標交付產能」咁話。

台企聯電早前話28納米製程過埋出年會供過於求，中芯就話會密切注意市場情況，話晒被美國列咗入「實體清單」做嘢要格外認真，不過，中芯產品好多，可以迎合到唔同需要，而且90至22納米製程用埋同一套設備，差在步驟唔同，所以一間廠啲設備調動吓就可以改變製程，家陣最多用係40同55納米製程，前者今年市場會特別缺貨。

至於中芯今季收入指引增長最少15%，大約10%由於客戶採用更高技術所帶來嘅均價上升，其餘5%嚟自出貨量多咗。但要留意番，中芯下半年毛利率會回落，只係全年會高過舊年嘅大約31%，因為擴產會帶來額外嘅折舊開支，舊年第四季嘅資本開支去到今年第三、四季就會「嚟料」。