絲絲講場：麥當勞潮搞虛擬餐廳

世事又點會咁易畀你料到？美國連鎖快餐品牌麥當勞月初向美國當局提交咗10個「元宇宙」商標註冊申請，包括「McMetaverse」，又提及要推出「以實際和虛擬商品為特色的虛擬餐廳」及「經營以送貨上門為特色的虛擬餐廳」，成為最大間投入「元宇宙」嘅快餐店。

麥當勞仲將旗下McCafe納入「元宇宙」商標申請，同時打算提供娛樂服務，包括提供網上實體和虛擬音樂會，另一份申請文件則提及打算推出「虛擬食品和飲料產品，可下載的多媒體文件包含插圖、文件、音訊、視訊文件及NFT（非同質化代幣） 」。咪住先，「虛擬食品和飲料產品」咁抽象，即係唔食得㗎？

每當虛擬貨幣大跌，幣圈班蟹民都自嘲「要去麥當勞打工」，薩爾瓦多總統都講過要去。而日前國際評級機構惠譽將薩爾瓦多嘅評級下調至垃圾級，理由係該國用比特幣作法定貨幣存在風險，另外對短期債務嘅依賴增加，導致融資風險升，將該國評級由「B-」降至「CCC」。唔知總統起行去麥當勞見工未呢？

不過，搞虛擬經濟又唔一定乞米嘅。香港有間元宇宙初創就好爭氣，Animoca Brands繼獲索羅斯旗下基金泵水，共籌得近3.6億美元後，外媒報道，著名投資公司KKR正就加入最新融資計劃進行談判，今輪融資約5億美元，Animoca估值近幾個月已翻一番有多。