昔日東方絲絲講場：利是封熱炒 皆因有心思？
過年最期待嘅環節就梗係收利是，不過今年因為防疫，連金管局同各大發鈔銀行都鼓勵大家派電子利是。雖則係咁，收到設計別出心裁嘅利是封，唔理入面個「餡料」幾多，都零舍開心。外媒都報道咗精於做生意嘅香港人，連利是封都拎上二手網炒，仲有價有市喎！絲絲即刻打開櫃桶睇一睇，嘩！我收到嗰啲仲靚喎！
最解思鄉之愁
當絲絲收到一田百貨嘅利是封嗰陣，簡直感覺到一陣櫻花香氣撲面而來，彷彿置身喺京都八坂神社門前咁！一田今年利是封套裝唔止跳出傳統框框，係立體印刷嘅，仲送埋一個御守（日式護身符）畀你，隨時祝福你。
最啱小朋友
呢款由觀塘apm出品嘅利是封，當收到嘅時候，封面係一隻微笑緊嘅老虎仔，但係當你拆利是嘅時候，拉一拉入面嘅機關，老虎仔就會化身笑面虎，仲會彈一句祝福語出嚟！細路仔收到肯定有排玩。
潮人之選
虛擬銀行誕生咗兩年左右，本身就係新潮嘢，而虛銀MOX亦都整咗個好新潮嘅利是封。一望落去就突破咗傳統大紅色，非常咁Sharp（鮮明），但睇真啲個印花，原來係傳統銅錢花紋嚟！果然同虛擬銀行服務一樣，結合傳統同現代科技！絲絲一影完相，套利是封就即刻畀全公司最潮嘅同事攞咗！
最有傳統特色
來自滙豐銀行嘅利是封套裝，咁厚禮，絲絲收到都嚇一跳。原來左手邊係一個賀年掛飾，右手邊係一大兩細共3款利是封。睇真啲，原來其中一款入面仲用國畫畫咗代表香港市花嘅洋紫荊入去，非常有心思！
全場最閃
恒生銀行今年設計都不惜工本，利是封都未擺「餡料」入去，拎上手已經有分量，而且有雷射反光，老遠見到都知你派利是，都咪話唔威水！而且絲絲認為呢款利是封，用嚟封婚禮人情一樣得，絕對唔怕嘥！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
