昔日東方絲絲講場：Lalamove踩過界搞網上花市
新冠肺炎Omicron變種病毒殺到本港，連原定本月26日開鑼嘅維園農曆年宵、花市等活動都被迫煞停。故此，香港送貨平台Lalamove就拿拿聲把握商機，「踩過界」喺尋日起至1月31日舉辦網上花市，希望為受影響嘅花農提供銷售渠道咁話喎！仲提供額外宣傳推廣同度身訂造嘅送貨服務，並邀請廣大市民齊齊撐本地花農，將新年氣氛直送屋企。
助本地花農渡逆境
雖然港府會向受影響檔主退還費用，同發放特惠金，可惜唔少花農慨嘆幫助不大。Lalamove今次就夥拍多家本地花店同花農售賣各種年花，傳統賀年年花、現代花藝設計等任君選擇。消費者網上選購完各花農商戶嘅出品後，Lalamove就會直送年花到屋企；若想幫襯園藝工程或親臨合作花場，慢慢精挑細選心頭好都得，購置應節年花之後，仲可以搵花店商戶代為「Call車」送貨，順手行個大運都算幾好意頭。
話晒生肖虎年開局，大家都唔想苦口苦面。Lalamove香港區總經理周嘉健開聲話，疫情已令各行各業面臨經營壓力，公司希望透過舉辦網上花市支持本地花農，開闢收入來源，令佢哋成年嘅心血唔會付諸流水，一齊走過逆境。同時，藉此為社會帶嚟正能量，分享新年喜悅、送上祝福，當然記得睇埋條款、用埋個優惠碼，即可兌換運費折扣優惠券，咁就皆大歡喜啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
