絲絲講場：財圈分析師選舉 花旗劉顯達騷肌拉票

打開一睇原來有兩條片，其中一條再次使出佢嘅胸肌同六舊腹肌，巡迴油麻地果欄同赤柱美利樓等馳名「地標」影寫真集，配埋奔放嘅背景音樂。另一條就高清描繪佢工作同操肌嘅生活，更擺埋上內地後生仔女最鍾意上嘅「B站」嗶哩嗶哩(09626)，務求要全國都感受到佢份激情。

點解話激情呢？話說2019年中，絲絲見Pierre以一身肌肉被封為「中環郭富城」，專訪佢嗰陣，佢工作再吃力都只係研究中港上市幾十隻公用股同相關設備股，點知佢同年11月開始「踩過界」做埋股市策略師，換言之，除咗緊貼眾多公用股嘅動態、個個禮拜出報告評述多晶硅價格，仲要定期發表恒生指數目標，更試過引用前蘇聯1957年搶先美國成功發射人造衞星去講投資策略，真係少一滴熱血都搞唔掂，更何況要Keep住操肌喎！

不過，Pierre之所以有今日全因為當初健康響起警號，事關佢以前由於日日坐低對住部電腦十幾個鐘，頸椎壓住神經線，更試過一星期食過百粒藥，卒之有次中醫同佢講︰「劉生，你唔使再嚟睇啦，你得兩個選擇，一係唔好再做依家呢種工，一係去做運動，行氣活血等啲軟骨生返出嚟」，就咁樣慢慢開始「華麗轉身」。