昔日東方絲絲講場：UNIQLO母企聘打工皇帝
有冇諗過，幾十蚊一件嘅「快速時裝」（Fast Fashion），背後嘅員工年薪分分鐘超過半億港元？日媒最新就報道，UNIQLO、GU母企日本迅銷(06288)社長柳井正，打算將招聘員工嘅最高年薪提升至10億日圓（約6,805萬港元），實行發掘「日本打工皇帝」！
高薪請人 工資年達6805萬
睇番數據，柳井正依家先拎緊4億日圓嘅年薪（約2,720萬港元）。換言之，有本事攞到6,805萬港元呢個新上限年薪的員工，年薪仲高過柳井正足足1.5倍，可想而知係幾咁大手筆！
柳井社長話，今次主要聘請能夠創造新價值或者可以白手興家嘅人，「對象是較他本人更優秀的天才級人員」，而且遇上好人才仲可以不設上限，預算請100至200人。至於喺迅銷總部返工、精通數碼化和電商交易（EC）及供應鏈嘅人才當然就最好，原因喺近年疫情加速網購轉型，集團要喺呢個戰場同其他電商，以至科技巨擘一較高下！
截至去年8月底，迅銷約有5.6萬名員工，其中總部員工約1,600人，大部分為社會招聘，平均年薪約960萬日圓（約65.3萬港元）。
娃哈哈豪派獎金響應「共富」
另邊廂，內地飲品界龍頭「娃哈哈」嘅打工仔同樣有福，事關集團創始人宗慶后講到明為員工預留咗逾6億元（人民幣‧下同）年終獎金，計番集團目前約3萬名員工，即係人均年終獎金有大約兩萬元。宗慶后仲提到，加薪呢啲係打工仔最愛嘅議題，仲話要多建1,300套廉價租房，以解除員工嘅住屋問題，果然係好積極響應「共同富裕」政策喎！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
