昔日東方絲絲講場：PayMe推群組利是功能 一次過可派百人
疫下電子產品滲透率大增，唔少消費者已習慣用智能手機進行交易支付和轉帳，加上依家世界講求環保，仲用利是封包利是，面對面接觸交收，真係太Out，相比之下電子利是就方便得多，有銀行睇準商機推出升級版電子利是。滙豐控股(00005)旗下PayMe就推出全新群組利是功能，由今日起，PayMe用戶可以一次過向多達100位收款人發送電子利是，並加入祝福語。用戶可選擇直接發送予指定收款人，或設定連結，並複製至社交通訊應用程式分享，親友按下連結就能夠收取電子利是。
每封固定金額最多200元
據介紹，PayMe用戶可向每位收款人送上固定金額，又或者選擇發送「開運利是」，讓親友收取隨機金額，每封固定金額的群組利是最高上限派200元。若用戶選擇設定連結，最高可一次過派發共10,000元，都咪話唔爽！
此外，由聽日起至2月15日，用戶使用PayMe派發群組利是，並有最少5位收款人領取，即可獲贈28元獎賞。用戶喺遍布全港超過20,000間網上及實體PayMe for Business商戶，以PayMe消費滿50元或以上，即會自動扣除獎賞金額。推廣期內，每位用戶最多可獲得3次獎賞。PayMe仲計劃喺Instagram舉辦「Pay PayMe 搶利是」互動遊戲，用戶上載同朋友競賽嘅影片，即有機會贏取由明星姜濤、王菀之、邱彥筒、許軼和YouTuber雞丁簽名的PayMeow禮品，相信會吸引到唔少「粉絲」參與！
疫下冇得去旅行「避年」，今年就連喺香港搞拜年活動都受防疫限制影響，好在電子溝通渠道日廣。新春足不出戶，都可以安在家中收發電子利是、視像拜年，感受吓創新科技帶畀大家嘅便利啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
