絲絲講場：經濟學家籲「印錢生娃」遭禁言

事緣任澤平周一（10日）在微博發表完「印錢生娃」解決人口高齡化問題嘅報告，吸睛度連絲絲都不知不覺間睇晒，何況係一眾滿腔熱血嘅內地網民，評價就當然有好有壞，一來建議人民銀行大拿拿拎兩萬億元人民幣鼓勵生仔，好似純粹計算生養成本嘅商業交易、又話唔好指望「90後」與「00後」班後生肯生仔等等，似乎偏離咗現代人自主性提高、年輕人不願生仔嘅核心問題。

以上種種言論，任澤平又點會唔知，所以都有簡要回應，仲講番2020年曾呼籲新基建和開放三孩政策，「初聽很勁爆，細想很有道理」，更進一步「自爆」同埋幾位統計學者、經濟學者、人口學研究者等志同道合人士，已一齊捐贈發起設立育媧人口研究院，揚言想更多有識之士齊齊關注同研究人口問題咁話。可惜佢名下嘅微博周三（12日）晚已變為禁言狀態，有內媒仲即刻致電對方關心下近況，但據報對方只係急忙掛斷電話，而東吳證券就暫未有回應。

雖然禁言原因外界目前無從知曉，但業界開始戥任澤平擔心，佢同東吳證券合作唔夠一年嘅關係會否生變。事有湊巧，東吳證券周三真係宣布人事變動，講緊嘅係公司業務骨幹之一丁文韜早已身兼總裁助理兼公司首席戰略官等職位，今次獲聘任為公司執委。另一位公司執委、「70後」姚眺則接替因年齡原因不再擔任公司副總裁、財務負責人嘅袁維靜。