絲絲講場：學者：內地技術領先 未來30年超越北宋

姚學者就解畫，新時代嘅內地經濟有幾項特點，首先係內地在許多中等技術層面的產品發展已經相當成熟，叻過唔少發達國家。高科技領域上，例如人工智能（AI），內地都係世界尖端。學者仲相信，未來5至10年，內地絕對會超越硅谷咁話喎，仲預測喺2028至2030年間將超越美國，成為世界第一大經濟體。

咪話絲絲唔識中史，雖然北宋嘅外交軍事極其弱雞，但當時經濟非常繁榮，商業繁盛貿易活躍，仲發明咗世界上最初的紙幣「交子」添！而且經歷過多次改革，百姓都叫安居樂業。北宋基本國策係「強幹弱枝」，亦即係中央集權，地方全部財富全歸中央，唔可以私留。不過，勝在有好官，大名鼎鼎嘅包青天、王安石、司馬光、歐陽修都係北宋人嚟！

講完北宋，又聽吓外國人點睇內地經濟。對沖基金橋水（Bridgewater）創始人、「鱷王」達利奧（Ray Dalio）就話內地「共同富裕」政策好，美國等各國都要縮窄貧富差距，要學習「共同富裕」。

作為對華大好友，達利奧激讚內地積極推動「共同富裕」，有助重新分配財富，人與人之間機會更平等，先會湧現更多人才。另外，佢亦都提到，投資者要更留意通脹，現金唔係「安全投資」，喺地緣政治、資產類別配置等方面多元化配置係關鍵。