昔日東方絲絲講場：馬雲曾嘲台企業家老 反比張忠謀早退休
所謂「話到口邊留三分」！昔日曾為全球10大富豪的馬雲，隨着旗下螞蟻集團中港上市計劃撻Q，受內地監管狙擊，旗艦阿里巴巴(09988)股價急挫，個人身家暴跌！有台灣媒體就搵出舊事，指馬雲喺2019年嘲諷「台灣企業家太老」，可如今馬雲已退任阿里主席，比已年屆90高齡的台積電創始人張忠謀更早退休！
阿里落魄 台積電股價屢破頂
張忠謀56歲時創立台積電，相比馬雲喺35歲創立阿里巴巴網站，年齡真係差一截。雖然年紀比較大，但勝在魄力夠，張氏做董事長做到87歲先退休，掌舵台積電足足31年，難怪被譽為台灣半導體之父，反而馬雲55歲已經退休歎世界。
如果你以為張忠謀事業有成係靠不眠不休得返嚟，咁就錯啦！佢曾經講過，「60年來，幾乎都能維持每周不待在公司超過50小時」，仲成日同啲員工講Work-Life Balance（工作與生活的平衡）。
馬雲退休後望住阿里風光不再，自己副身家係咁縮水；反觀，張忠謀創立的台積電股價迭創新高，成全球行業一哥，真正做到行穩致遠。
講開，澳洲悉尼大學研究1992至2016年間1.9萬個行政總裁（CEO），意外發現CEO任期愈久，股票回報率更高。早排更有統計列出美企在位最耐嘅行政總裁，原來係股神巴菲特。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
