昔日東方絲絲講場：內地分析師用風水測市被警示
正所謂「能知三日事，富貴萬千年」，趨吉避凶係人嘅本性，於是人類就研發出唔同方法預測股市嘅價格，主流係用歷史數據建立預測模型，或者預測某個期間嘅盈利乘個合理市盈率得出目標價，更有券商每年新年前都發表風水指數。不過，內地有人用天干地支研究A股大市而被監管機構「請飲茶」！
話說國盛證券有位叫劉富兵嘅研究員，幾個月前掟咗一份全長20頁叫《天干地支在擇時中的應用初探》嘅PowerPoint報告，封面除咗呢個標題之外，下面仲有句「打造極致專業及效率」，方法係將A股過去大約30年按年按月分成唔同天干地支後，望吓回報係點。
A股今日復市，直接跳去嗰份報告嘅重要發現啦！過去「只有干生支的年份全部上漲」，2022年偏偏係一個「干生支」年喎，今個月起4個月依次係辛丑、壬寅、癸卯、甲辰，歷史上唔係大機會上漲，就係全部上漲。
江西證監：方法不專業
不過，江西證監局早前因呢份報告對國盛證券發出警示函，指劉富兵「利用干地支紀曆分析股票市場走勢，研究方法不專業審慎，研究結論不客觀科學」，又話報告製作同流傳有問題，因此要對佢採取監管談話嘅行政監管措施。事實上，中國證券業協會舊年修訂過《發布證券研究報告執業規範》同《證券分析師執業行為準則》，提高相關要求。
如果你問絲絲份報告有咩問題，其中一個係佢啲回報數據無寫明係邊個指數！都係聽番啲正經財經分析啦！大和經濟師賴志文預計，今年內地貨幣政策喺債務危機同成本通脹下處於兩難，人仔兌每美元或會碌落6.9，出年甚至見7，各位睇路啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
