絲絲講場：「補習教父」直播促銷農產品

直播帶貨？即係直播同時推銷貨品，人氣同粉絲當然係關鍵啦，之但係近排內地「直播一姐」薇婭（網名）因為逃稅而被重罰逾13億元人民幣喎，加上唔少明星同藝人嘅賣貨能力都差過預期，「補習教父」唔驚企業家聲名從此一朝喪咩？俞老師就自爆決定做直播帶貨時，周圍幾乎都係反對聲音，又話難做又話直播帶貨風口過咗，仲話：「他心裏很清楚，直播帶貨是很難開展的事，但還是在11月的一場直播中，說出了那個決定。」

無錯，俞老師本身都係商界網絡紅人，絲絲上個月有留意到俞敏洪預告，話新東方成立一個大型農業平台，佢仲試過用超過50分鐘嘅時間賣書，期間銷售額約27萬元人民幣，「雙11」又有現身手機幕前直播賣貨等，明顯試晒水溫。直到尋晚跳出框框促銷農產品，俞老師嘅解釋理由之一就係佢由細到18歲都喺農村長大，本身都係農民孩子；更大意義當然係「共同富裕」，通過俞老師同平台力量，讓更多農民有所收益。

姑勿論成績如何，淨係講得出、做得到呢點，就勇氣可嘉，最緊要教育永遠係佢哋嘅初心，公司揚言會繼續喺教育領域努力。