昔日東方絲絲講場：英員工請病假 僱主年內失4432億
打工仔生病，請病假停工在家休息，係正常不過嘅事，最少唔會傳染畀同事，影響公司運作嘛。不過，原來請病假真係唔係你一個人或一條team嘅事，仲關乎成個經濟。唔係絲絲危言聳聽，外國公司GoodShape做咗一項研究，顯示截至今年11月28日，英國員工請病假為僱主造成嘅經濟損失高達430億英鎊（約4,432億港元），比起2019年未有新冠肺炎疫情嘅時候多咗31%。
以上嘅損失仲未包括請人替更、業務停滯、訓練及為其他員工提供協助等非直接成本，加埋嘅話損失會更大。
心理病屬頭號原因
至於病假理由首位係「心理疾病」，佔18.8%，並且差唔多各行各業都以呢個理由最多，除咗以下幾類工種唔係：運輸及物流、消費與零售，以及為工作場所提供服務嘅行業。第二位係因為確診咗新冠肺炎，佔15.8%。至於第三至五位分別係肌肉骨骼問題、疑似中新冠，同埋腸胃問題，分別佔11.2%、4.3%同2.8%。
如果以日數計，今年全英員工合計請咗3.19億日病假，比2019年升27.6%。
唔好忽視心理病呀，因為研究亦發現，如果員工有多於一項心理病需要請假嘅話，佢有54%機會劈炮唔撈！今次研究嘅負責人就話，疫情令各行業對員工要求高咗、收緊預算力度大咗。但好嘅方面，係見到商界已意識到，績效同員工嘅福祉係密不可分㗎。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
