昔日東方絲絲講場：幣安趙長鵬成華人首富 靠虛幣
農夫山泉(09633)創始人兼董事長鍾睒睒「華人首富」嘅位置仲未坐暖就要讓位。內地媒體報道，全球最大虛擬貨幣交易所幣安（Binance）聯合創始人兼行政總裁趙長鵬嘅身家已飆升至900億美元（約7,020億港元），高過上月《福布斯》雜誌所公布有4,244億元人民幣（約5,200億港元）身家嘅鍾睒睒，一躍成為華人首富。
交易所估值逾2.3萬億
事實上，近年虛擬貨幣價格飆升，相關虛擬資產交易規模水漲船高；內媒引述內部人士指，按目前交易規模，幣安嘅估值達3,000億美元（約2.34萬億港元）。按《福布斯》數據推算，擁有幣安30%股份嘅趙長鵬身家現達900億美元，躋身全球10大富豪之列。
消息傳出後，趙長鵬喺Twitter「謙虛」咁話公司嘅股份無流動性，故估值意義唔大。而內地網民亦無祝賀佢，更有人搵返幣安之前嘅醜聞，批評身居海外嘅趙氏喺中國「割韮菜」致富。
除咗內地網民，趙長鵬亦同Tesla創始人馬斯克有口水戰。事關上月幣安聲稱因技術問題，暫停平台有關狗狗幣嘅提款功能兩星期，隨即被馬斯克認為事件有可疑，仲喺Twitter條貼文標記趙氏，話「持有狗狗幣嘅人係無辜，唔應該因幣安嘅技術問題而受連累」。
趙長鵬之後反擊，話依家正同團隊合作處理技術問題，附件仲有條Tesla因軟件出問題，緊急召回旗下電動車嘅新聞，好似笑佢都係一丘之貉。直至本周一，幣安終於宣布解決軟件問題並恢復狗狗幣嘅提款功能。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
