昔日東方絲絲講場：台積電張忠謀擺壽宴抽Intel水 ?
世界最大晶片代工商台積電嘅創始人張忠謀7月10日90大壽，但疫情關係直到前日先補辦壽宴，賓客名單星光熠熠，獲邀嘅台灣上市公司，市值加埋係台股三分之一！
張忠謀喺宴會發表感言，講述佢由美國過台灣發展以嚟令佢出乎意料嘅事，尤其係曾被佢奉為「神」嘅國際商業機器（IBM）同英特爾（Intel），依家市值都被台積電超越，值得業界警惕，即使係技術領先嘅龍頭公司都要不斷努力先可以保持領先地位。
親力親為搞90大壽
大家可能覺得以上嘅感言無乜啟發，但知易行難嘛，仲有佢口中「好唔客氣」嘅英特爾新帥蓋爾辛格，上場以來起勢燒錢攻晶片工藝，向台積電「挑機」，可見張忠謀要提醒台下嘅台積電現任主管同員工醒醒定定！事實上，90大壽餐飯話就話係台積電幫手搞，但過程張忠謀夫婦有親力親為參與。
第一個交功課嘅主管係研發副總經理余振華，佢喺一個論壇上話，台積電嘅先進封裝技術平台3D Fabric率先進入新階段，之後會着重晶片之間連結密度加強、封裝尺寸大細兩個方向，但仲要面對成本控制同精準製程控制嘅挑戰，希望同供應鏈合作解決。
絲絲睇過張忠謀早前發表嘅10項經營企業嘅基本功，要點包括着重並了解不同技術、包容新事物等，而絲絲覺得最有得着係專注聆聽先識得思考，要學識理解對方想表達嘅意涵，說話背後有咩動機。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
