絲絲講場：華爾街才俊花紅12年最和味

研究顯示，成條華爾街以投資銀行家同股票交易員將獲得最豐厚嘅獎金。其他工友都唔差，總體嚟講，包括埋現金獎金同股權獎勵，今年底嘅獎金比起舊年大幅提高，對比之下，舊年大多數專業人士嘅獎金都勁縮水。

今年獎金激增，反映交易活動創紀錄，因為美國政府嘅經濟刺激措施又派錢又印銀紙，炒起全球股市。根據調查，投資銀行承銷商嘅獎金預料飆35%，投行顧問、股票銷售同交易專業人士嘅獎金就預計增加兩至三成。

Johnson Associates總經理Alan Johnson指，今年華爾街獎金可能係歷年來數一數二咁勁，幾乎所有金融服務行業部門，包括投行、資產管理同另類投資都有創紀錄表現，轉化為獎金增長就梗係「和味」啦。私募股權同資產管理公司、對沖基金甚至管理崗位嘅工友們，都預計有雙位數增長嘅獎金。

不過，研究亦顯示，雖然零售同商業銀行工作人員嘅獎金預計都有份加，但就得5%。而墊底嘅部門係邊個？固定收益銷售人員同交易員獎金預計持平，甚至可能略低過舊年。