昔日東方絲絲講場：日進口「珍珠」漲價 原來關內地養豬事？
珍珠奶茶嘅魅力風靡全球，連好少人會喺條街度飲嘢食嘢嘅日本都唔例外，珍珠奶茶店喺2018年已開到成行成市。不過，近兩年由於新冠肺炎疫情關係，真係少咗好多人攞住杯珍奶喺條街度打卡，加上遊客減少，令呢個熱潮退卻，令今年1至9月日本進口原材料「珍珠」（其實佢個正名係木薯球，主要成分包括木薯澱粉）量較去年及前年同期分別大跌八成同埋五成。
如果你覺得需求減少，就令到木薯嘅價格下跌嘅話，咁絲絲只能講一句：「少年，你真係太年輕啦！」事實係相反，「珍珠」原材料木薯澱粉今年首9個月日本進口價按年上升咗15%。
粟米木薯需求大增
至於漲價原因，居然同內地養多咗豬有關！首先大家要知道木薯同粟米一樣，都可以造成加工食品及動物飼料等。而喺2018年非洲豬瘟肆虐之後，內地就增加咗養豬嘅數量，近兩年大規模養殖取得進展，加上內地已定好減碳目標，對能夠提煉出生物燃料乙醇嘅粟米同木薯需求都大幅上升。
今年1至8月，內地由泰國進口的木薯片（工業用原料）總量高達384萬噸，多過前兩年嘅每年進口量。喺今年9月泰國木薯澱粉（加工食品原料）出口價就較年初升咗超過一成，原因都係同對內地出口量正在增加有關。
下次大家買完珍奶想影相打卡之前，真係要記得「粒粒（珍珠）皆辛苦」；絲絲就希望，疫情過後可以去日本嘅話，當地啲珍奶唔好加價加得太多啦。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
