絲絲講場：內地補習龍頭轉行賣菜

中央一紙「雙減」政策打殘內地補習行業，一眾投資者以至「塘邊鶴」都不禁嘩然，但龍頭企業新東方(09901)嘅救亡大計可能令你更嘩然！

支持鄉村振興事業

新東方創始人俞敏洪透露，過去使咗60億至70億元人民幣裝修、接近1,500個教學點需要退租，並且已經捐出8萬套枱枱櫈櫈，之後仲會再捐。呢批枱櫈絕對唔係我哋小學坐開嗰批普通嘢，冚把冷專門訂製，一啲可以根據小朋友嘅身高調節高度，一啲仲整成圓角，費事細蚊仔撞損，「每套大概市價六七百塊錢（人民幣）」，就咁捐咗去你都咪話唔肉赤。

壯士斷臂係人都識，點活下去先考功夫。俞敏洪話，新東方計劃成立一個大型「農業平台」，自己會同幾百位老師一直「直播帶貨」促銷農產品，支持鄉村振興事業。

本身係商界網絡紅人嘅俞敏洪咁做，莫非係見到阿里巴巴(09988)創始人馬雲早前出訪歐洲考察農業科技，突然靈機一觸乎？「支持鄉村振興事業」聽起嚟都好有「共同富裕」嘅範兒啵。

不過，一眾滿腹經綸嘅補習老師，就算未到橫渠先生「為往聖繼絕學，為萬世開太平」嘅境界，大概發夢都冇諗過要拋頭露面賣菜啩？「人間正道是滄桑」，樂觀啲諗，國家唔再打壓電商平台就仲有機會畀你繼續靠把口搵食，掂啦，富可敵國嘅「馬老師」咪又係教書出身！

另外，俞敏洪話，新東方流動性無問題，仲會做多啲大專業務，即係幫研究生準備出國升學之類，亦會拓展計算機（電腦）等級考試、司法考試等項目。佢亦鼓勵各地分校校長諗吓其他新意思，「大不了嘗試所有業務都失敗了，新東方帳上沒錢了，我們喝頓大酒就散伙」，學嘢啦！

余絲韻

「東網Money18」fb專頁：有討論、有分析，齊來FUN享，贏盡●你Like

Money18更多即時港股指數資訊