絲絲講場：北京山寨告贏正版 無印良品好無癮

兩公司之所以對簿公堂，事緣日本無印良品曾出聲明，話被「其他公司」搶先註冊商標，而北京無印良品就認為份聲明內容足以導致公眾將「其他公司」與其畫上等號。

咁北京市朝陽區人民法院又點睇單案呢？判詞話，喺商標法入面，「搶先註冊」已經包含行為不法的否定性評判。喺呢個前提下，被告指稱原告搶註商標，既不符合客觀事實，亦屬於貶損性的評判，涉案聲明客觀上存在違背事實嘅表述，進而實際上貶損原告商譽。

如是者，法院最後判決株式會社良品計劃及無印良品（上海）商業有限公司賠償北京無印良品經濟損失30萬元、制止侵權合理開支10萬元，並要喺無印良品MUJI官方旗艦店、內地地區實體門店公開刊登書面聲明，以消除涉案商業詆毀行為嘅影響。

睇完成單案，絲絲覺得，好似略有《聖經》舊約所羅門王嘅「智斷親子案」嘅影子……而內地網民就更熱烈討論呢單「山寨鬥正印」事件，話係「李鬼起訴李逵 」，變成「無良印品」云云！