任正非領華為軍團 為和平出力

華為員工網上平台上載咗段影片，內容係10月29日華為喺松山湖園區舉行「軍團」組建成立大會。華為創始人任正非喺現場話「沒有退路就是勝利之路」。以絲絲嘅理解，即係「破釜沉舟」啦。其實自從美國政府限制華為買美國晶片後，以前「囤」落嘅晶片計落用到「乾塘」咁滯，可以講真係冇退路啦！

至於呢個軍團組建大會係做乜嘅呢？據內媒引述華為內部人士表示，華為希望可集結內部行業專家，挖掘各個業務嘅最大潛力。目前軍團喺組織架構上係獨立組織，由任正非親自制訂並督導。具體即係透過軍團作戰，打破組織邊界，快速集結資源，提升效率。目前華為分別有煤礦軍團、智慧公路軍團、海關和港口軍團、智能光伏軍團和數據中心能源軍團等。

更耐人尋味嘅就係，任正非喺軍團組建大會發表講話，佢同班員工講：「我認為和平是打出來的，我們要用艱苦奮鬥，英勇犧牲，打出一個未來30年的和平環境」、「為國捨命，日月同光，鳳凰涅槃，人天共仰！」唔講以為睇緊《倚天屠龍記》6大派圍攻光明頂，打份工啫，唔使英勇犧牲咁嚴重啩？