絲絲講場：帶頭告別「996」字節跳動唔准OT

中國以農立國，民族性嚟計就天生比較勤力，所以唔好埋怨日日都要加班（OT），天性嚟。不過，內地開始有啲大企業意圖改變員工「天性」，剝奪員工加班權利，邊間公司咁可惡？

根據外媒報道，抖音母公司字節跳動（ByteDance）下令員工每晚7點鐘準時收工，成為內地少數正式強制縮短工作時間嘅科技企業。根據公司內部文件，字節跳動要求喺內地返工嘅員工，只可以返星期一至五，朝10晚7。

冇得享受OT嘅樂趣？公司又唔係一刀切，新政策之下，員工只能申請平日3小時或周末8小時加班，仲會依據加班時數有「補水」。

內地呢幾年間科技突飛猛進，除咗靠聰明才智之外，仲有苦幹。「996」工作文化亦隨之興起，即係返朝9晚9，做足6日。要做到「共同富裕」，唔止係企業荷包富裕，連員工精神上都要富裕嘛！所以，今年內地短片平台快手(01024)都取消咗嚴苛嘅輪班制。

抖音活躍用戶增長遇瓶頸

不過，一味苦幹都始終唔可以解決晒所有問題嘅。內媒披露，截至今年9月，抖音系日均活躍用戶（DAU）人數增長至約6.4億人次，其中主站佔約5億，「極速版」約1.4億。總數係好多，不過，就到咗瓶頸位置，增長開始停滯。

自從抖音公布DAU超過6億以來，過咗一年幾都只係增長咗4,000萬人次左右，主要靠社交活動同直播帶動，主站DAU冇明顯增長。遙想喺2019至2020年期間，抖音DAU從2.5億增長至逾4億，現今真係唔可以同日而語。而除咗叫員工減少OT之外，抖音已喺人事上作出組織架構調整，希望有新作風。

余絲韻

爆料熱線：

(852) 3600 3600

傳真：

(852) 3600 8800

SMS：

(852) 6500 6500

電郵：

網上爆料：

MMS：