昔日東方絲絲講場：滙豐K11 ATELIER開財管中心
滙豐銀行喺尖沙咀K11 ATELIER開咗全新嘅滙豐財富管理中心及滙豐保險尊尚健康管理中心，由倫敦轉駐香港嘅滙豐亞太區財富管理及個人銀行業務主管欣格雷（Greg Hingston），及滙豐財富管理及個人銀行業務全球行政總裁馬勵濤（Nuno Matos）都有出席開幕儀式，馬勵濤仲好開心咁話佢完咗21日隔離，依家好享受香港嘅生活。
亞洲區一向都係滙豐嘅盈利重鎮，欣格雷表示，滙豐今年第三季亞洲財富結餘按年升一成至1.6萬億美元；全球私人銀行業務於期內錄得39億美元新資金淨額流入，當中亞太區就佔80%。
之前，滙豐香港區財富管理及個人銀行業務主管伍楊玉如（Maggie）早前同滙豐保險香港行政總裁文德華（Edward Moncreiffe）去「巡舖」，原來理財中心隔籬就有埋診所可以驗身，真係投保「一站式」。文德華介紹，明年計劃喺港島增設一家尊尚健康管理中心，同時有計劃喺大灣區開一家，沿用毗鄰財富管理中心的運作模式。
力讚代言人助吸年輕客
睇番滙豐上半年本地客戶的新做保費按年增加35%，屬於高資產淨值客戶嘅保單超過17,500份，總投保額超過280億美元。滙豐今年計劃在香港招聘300至400名前線財富管理專家，當中包括專門提供跨境理財通服務的人手。
文德華作為外國人，估唔到都識得本地男團成員姜濤，佢話呢位滙豐廣告代言人非常之稱職，幫到公司吸引一班原本未必對銀行服務有興趣嘅年輕客戶喎。至於呢班新客係男多定女多？哈哈哈，只要係客就無所謂啦。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
