絲絲講場：渤海銀行傳挪用內企28億存款 超驚嚇

事緣濟民可信子公司負責人有日收到渤海銀行南京分行營業部工作人員來電，問「企業是否有辦理存單抵押業務的真實意願？」，因為有人正喺銀行櫃枱將電子存款轉為紙質存單，並以此為他人貸款辦理抵押。

就係咁，濟民可信意外發現自己筆錢喺毫不知情嘅情況下，被挪用於為華業石化嘅貸款提供抵押擔保。當時濟民可信已要求銀行報警。不過搞咗幾個星期後，渤海銀行先發聲明話已經報案，並承諾將堅決維護客戶合法權益，保障客戶資金安全。

銀行呢頭道完歉，嗰頭就提出「解決方案」，就係希望濟民可信繼續畀銀行用佢啲存款，為華業石化作貸款擔保。濟民可信心諗，究竟華業石化同渤海銀行咩關係呢？原來華業石化係國企中國石油全資孫公司，而華業石化資金部總監曾經表示同渤海銀行合作係互惠互利，「當時與有些合作的銀行關係比較好，銀行做存款，我做貸款，對銀行來說也有衝量的業務」。

該行已就報道澄清，指已經向執法機構報案，會依法尋求司法解決。