昔日東方絲絲講場：萬達太子爺轟美團App無保障
大家有無試過社交媒體帳號被盜呢？萬達集團王健林嘅獨子、內地富二代王思聰日前喺微博大呻，話喺美團(03690)旗下社交平台大眾點評嘅個人帳號被盜取，已綁定嘅手機號碼被更改，怒斥市值過萬億元嘅公司安全系統竟然毫無保障。大眾點評梗係嗱嗱聲道歉，並將王思聰嘅帳號保護性凍結。
改手機號碼毋須認證
事件引發內地網友熱議，原來唔少網友都話自己有類似經歷，有個網紅話，試過用美團手機應用程式（App）每隔5分鐘就問佢攞定位資訊，持續24小時。截至目前為止美團仍未就事件作回應，唔通因為個網紅唔夠王思聰出名？
另有內地網友爆料，話美團客服曾表示，只要有手機號碼、身份證號碼、消費過嘅訂單就可以更改綁定手機號碼，完全唔使本人手機嘅認證碼，搞到佢不禁對天長嘆，「個人資訊安全誰來保障」！
再話你知，2015年美團同大眾點評合併成立新公司美團點評，從此之後，美團同大眾點評就用同一個帳號體系，用戶喺大眾點評對帳戶進行換綁或注銷，都會同步影響對應嘅美團帳戶。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
