絲絲講場：Nike高層自爆大秘密 警惕勿凡事Just Do It

話說現年72歲嘅米勒最近接受媒體訪問時自爆，話雖然出生於安穩家庭，但13歲開始行歪路，入咗費城一個幫派，16歲更開槍射殺一個年僅18歲、連係邊個都唔知嘅年輕人。之後不停入冊出冊，直到30歲。

不過，絲絲講得嘅一定係勵志故事啦。米勒被關押期間洗心革面，仲讀番書。放監嗰陣，佢已經揸住天普大學（Temple University）會計學位。

原本他有機會去著名會計師樓打工，但當佢講到自己有「前科」時，應徵職位就「返屋企等通知」，當時佢發誓要保守呢個秘密。

之後，大企業金寶湯請咗佢（因為面試時淨係問佢5年內有冇犯事，但佢殺人已經10幾年前），於是米勒開展咗商業之路。佢1997年成為Nike籃球品牌副總裁，1999年成為Jordan總裁，2006年成為NBA拓荒者隊總裁，2012年再度執掌Jordan。米高佐敦當時讚佢係一個「強勢領袖，識得點樣加速一個高端品牌嘅增長」。

Nike知道咗件事之後都相當支持米勒，舵手多納霍仲話希望米勒係堅毅精神嘅人辦。

學本大絲話齋，社會應該放低成見，接納同畀機會一啲更生人士，等佢哋可以貢獻社會。不過，米勒犯法嘅故事話畀大家知，凡事一定要三思，唔係咩都可以「Just Do It」（即管做）！