絲絲講場：恒大前軍師捱轟 發千字文解畫

話說任澤平2017年12月加盟恒大冇幾耐，恒大負債率已飆至86.25%，仲計劃多元化擴張。見到咁，佢當然要進諫啦。「一向觀點鮮明直接、個性耿直」嘅任澤平，當住公司幾位主要負責人嘅面，直言內地及海外企業發展史清楚寫到明，多元化大多失敗。結果佢喺公司幹部大會上大受批評，大概話佢「格局不夠、認識不到公司重大戰略」。據講呢件事對佢打擊好大，但其後諗通咗，研究只能起輔助作用，唔可能越俎代庖代替決策者拍板。就算之後行業同金融監管從嚴，佢都只係提示風險。

任博士又話，恒大總部喺深圳，但佢長年喺北京，平均一個月去深圳幾日，「很多會議也參加不了，很多情況不了解」，副總裁級嘅自己完全談不上係公司核心決策層，最終因為「言不為用」萌生去意，但佢仍希望恒大能走出困境。

任澤平今年3月正式辭任，現擔任東吳證券首席經濟學家，兩個月前話中國可能「處於滯脹到衰退階段」，呢次又準唔準呢？