昔日東方絲絲講場：恒生請前「亞洲車神」教員工運動
去年受疫情影響，唔少金融機構員工都要在家工作（WFH），做運動都要喺屋企做。絲絲聽講恒生銀行(00011)亦因此為員工安排一系列唔同主題嘅網上活動，當中包括與「奧夢成真」團隊合作，由運動員網上提供專業運動指導，其中一個就係大家都熟悉嘅前「亞洲車神」黃金寶，由佢分享單車運動員生涯同傳授單車知識。
今年疫情穩定番，大家都有得見吓面，恒生更進一步同「奧夢成真」團隊合作，唔再只講理論，仲昇華至行動，邀請現役及退役運動員去恒生總行健身角做駐場教練，各有不同運動項目專長，為員工提供專業指導及健身和運動訓練，鼓勵大家多做運動、強身健體。
總行增多項設施留住人才
此外，近年銀行新興引進新工作模式，恒生總行辦公室亦都增設唔同設施，員工唔止可以運動健身，仲開設乒乓球室、有得打機嘅遊戲室同按摩椅休息室，而遊戲室內設有遊戲機、桌球枱和足球機等，員工做完嘢都可以放鬆減減壓。
室內運動滿足唔到你？該行仲有獨木舟課程，請來前香港獨木舟隊教練何賢藝，講解本港獨木舟浮潛熱點，同埋點樣規劃行程等。除咗做運動，該行仲設有獨立哺乳間嘅設施，關心埋員工嘅下一代。
早排絲絲先聽到金管局大呻銀行業人才短缺，今次本地銀行出招加強員工福利，呢項德政相信有助留住人才！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
