昔日東方絲絲講場：「教主」仙遊10周年掀追憶潮
禮拜二係蘋果公司（Apple Inc.）創始人喬布斯嘅忌日，換言之唔經唔覺以一部iPhone顛覆咗手機以至科技行業嘅「教主」，已經仙遊10年了。繼承佢出任Apple行政總裁亦都已經有10年嘅庫克，前日就喺社交網站Twitter發文緬懷佢呢位「伯樂」，並以喬布斯嘅名言「有熱情嘅人可以令世界變得更加美好」來為大家打氣。
庫克同時向員工發內部電郵，話自己冇一日唔諗起「教主」，永遠懷念同珍惜佢。除咗感謝喬布斯幫助包括佢在內無數嘅人認識自己潛能，又叫大家喺喬布斯離開10周年嘅日子靜落嚟反思一下佢留低嘅傳奇故事，其中包括佢生前每日都喺度諗未來係點，並且推動大家思考「世界會係點」，而唔係「世界係點」，之後不停奮鬥實現自己嘅願景。
勵志金句助渡難關
疫情肆虐令好多人覺得前路茫茫，所以喬布斯勵志嘅故事喺當前呢個咁困難嘅時期，尤其令人感慨萬千。
跟貼「留名」嘅人唔少藉此機會分享受過「教主」乜嘢鼓舞，其中有人摷番喬布斯2005年喺史丹福大學畢業禮嘅致詞，大意包括「如果你要建功立業，凡事你都一定要有自己嘅睇法」、「熱愛你所做嘅嘢先成就到大事」、「人生無指南……好奇心就係你嘅嚮導」、「千祈唔好屈服同逃避對於未知嘅恐懼」。
另有人諗起「教主」對生死嘅見解，話「我總覺得人過身之後會有嘢流傳落去，好難想像一個人成世累積咗咁多經驗可以就咁帶埋落下面就算」，大有中國人「死而不亡者壽」嘅境界。
余絲韻
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
