絲絲講場：美400大富豪榜出爐貝索斯居首特朗普無影

福布斯發布2021年度美國富豪榜，亞馬遜創始人貝索斯以2,010億美元嘅身家位居榜首，亦成為首位身家超過2,000億美元嘅富豪。更多人留意嘅係，美國前總統特朗普近25年以來首次跌出該富豪榜。

蓋茨跌出三甲股神排第8

美國富豪榜顯示，2021年度400位富豪財富總額增長40%，達到4.5萬億美元。受惠於旗下電動車公司股價上升，SpaceX行政總裁馬斯克嘅財富年內增加1,200億美元，至1,905億美元，位居第二；社交平台Facebook舵手朱克伯格則擁有1,345億美元身家，排名第3位。

微軟創始人蓋茨位列第4，係佢自1991年以來首次跌出榜單頭兩名，佢擁有財富約1,340億美元。「股神」巴菲特則排名第8，身家約1,020億美元。

福布斯估計，2021年度特朗普身家約為25億美元，距離今年福布斯400強美國富豪榜嘅門檻仲差4億美元。其實自從疫情以來，特朗普身家縮水咗6億美元，連累佢冇得上榜，皆因期間佢嘅核心房產業務表現大受打擊。

特朗普喺1982至1989年連續7年登上美國400富豪榜，其後由1996到2020年，再連續25年登上富豪榜，到今年先至「斷纜」。去年佢喺榜單上嘅排名係第339位，前年則排第275位。

余絲韻

爆料熱線：

(852) 3600 3600

傳真：

(852) 3600 8800

SMS：

(852) 6500 6500

電郵：

網上爆料：

MMS：

絲絲講場：美400大富豪榜出爐 貝索斯居首 特朗普無影