絲絲講場：汽車狂人撈過界 殺入手機市場

呢個手機項目總部落戶喺武漢經濟技術開發區，定位高端智能手機，服務全球市場。

另邊廂，內地智能手機大廠小米集團(01810)今個月初先宣布，小米汽車已經完成註冊。之前仲話，未來10年小米會投入100億美元造車。

造車真係咁好景？偏偏李書福又「漏夜趕科場」喎。佢表示，手機係快速換代嘅隨身移動終端，係電子產品市場驗證同軟件創新嘅應用載體，既可以等用戶盡快分享創新成果，又可以將安全、可靠嘅一部分成果轉移到汽車度應用，實現車同手機軟件技術嘅緊密互動。

而且，佢都幾有野心（口架），外媒引述消息指，呢間智能手機公司總投資100億元（人民幣‧下同），8年內預計實現累計營收約1,500億元，公司達3,000人規模，計劃2023年推出手機產品，預計首年銷售300萬部，實現銷售收入100億元。

內媒分析指出，吉利舊年下半年開始梳理各條業務線同子公司，而跨部門合作成為新發展重心，有助手機業務發展。

近年來，吉汽嘅母企吉利控股加大前瞻科技領域投入，加快向創新型科技企業轉型，唔止手機，仲布局埋衞星同飛行汽車添。如果成真嘅話，用戶就成個生活都非常之咁「吉利」喇！