昔日東方絲絲講場：江南布衣童裝超驚嚇 設計捱轟
內地監管當局連服裝公司都要約談、整改？事緣江南布衣(03306)旗下嘅童裝產品線，最近畀媽媽級網民發現，個仔着緊嘅童裝衫上面，竟然用英文寫住「歡迎來到地獄」！
事件在網上曝光後一發不可收拾，有網民即刻摷返屋企啲衫仔出嚟逐件查字典，發現江南布衣童裝仲印咗好多大人着都要打格仔嘅印花同字句，其中一個例子，就係印有一個疑似魔鬼掹住一隻人腳，旁邊就印句「雞腸」：「我需要一隻腳」。喂，好得人驚啫！畀細路仔着，會唔會學壞(口架)？
市監局等介入調查
江南布衣之前已經喺多個社交平台為此道歉，並發布咗《致消費者的一封信》，稱將成立專項小組啟動自查，「在未來將創新創意和美好觀念更好地融合到設計中」。
不過，內地官方當然唔收貨啦，西湖區相關部門就話，已約談該企業，責成企業立即下架涉事童裝以及同類型款式服裝，對已售涉事童裝作退貨處理。同時，成立由區市場監管局等部門和屬地街道組成的調查組，對該事件進行調查，並將依據調查結果依法依規進行處理。
睇嚟股民亦都唔收貨，江南布衣尋日股價大跌9.34%，創逾兩個月新低，收報13.58元，單日市值蒸發7.2億元。
更甚係，事件招來網民起底，發現江南布衣2016年嘅招股書顯示，大股東李琳同吳健夫婦國籍已非中國籍，而係聖基茨和尼維斯籍（The Federation of Saint Kitts and Nevis），就睇吓班網民口誅筆伐幾時完啦……
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
