昔日東方絲絲講場：SEC主席超離地 話儲錢8厘回報
雖然位高權重嘅人講嘢離地時有發生，但向年輕人灌輸錯誤嘅知識就唔係咁好啦。講緊係美國證券交易委員會（SEC）主席亨斯勒，話說佢拍咗條片放上自己個Twitter，教大學生盡早儲錢，仲要定期儲喎。
教人定期儲蓄，積少成多係件好事，驟耳聽好正路吖，尤其喺美國呢個習慣以信用卡借錢消費，先使未來錢嘅國家，教人儲錢簡直係造福人群。不過，佢就愈講愈離地，話只要你每星期儲5美元，然後有8厘回報，咁你65歲退休時就有超過13萬美元可以使啦！但如果你40歲先嚟儲錢，每個星期就要儲30美元咁話。
虛幣界睇唔過眼出力踩
讀者雪亮嘅眼睛一睇，當然好想知喺如今近乎零息嘅環境下，邊度儲錢可以享有8厘回報？呢段片一出，鞭撻得佢最大力嘅係虛擬貨幣公司啲大佬同埋一眾虛擬貨幣炒家，皆因依家銀行最高息都係只得0.6厘，咁係咪要叫啲後生仔去炒虛幣呀！更有唔少人批評，喺通脹升溫，但存款利息低企下，儲錢只會換來負回報，完全唔合邏輯。
點解一眾虛幣界踩佢踩得咁落力？皆因SEC係最用力壓制虛幣嘅監管機構之一。好似Coinbase（美股：COIN）咁，之前公司想推出一個虛幣借貸計劃，參與客戶每年可收息4厘，但就因為SEC威脅要告公司而叫停。另一間叫做Celsius Network嘅虛幣借貸平台，現時就分別畀美國3個州嘅監管機構告緊，指公司推出未經註冊嘅投資產品。虛幣業界備受打壓，難怪會對SEC高層發噏風咁睇唔過眼啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
