絲絲講場：Fb原價買欠單 幫細企周轉

大家可能會問，買單據，又點樣幫到啲弱勢呢？其實公司收錢唔係就咁一買一賣咁簡單，啲錢往往都要經過好多重步驟，甚至要等好幾個月先可以到帳入袋。應收帳款仲未入袋，但小企業就要畀買貨錢喇，周轉壓力可想而知。所以今次Facebook呢次計劃，簡單啲嚟講就係幫佢哋周轉，Facebook用原價買小企業嘅單據，之後就搵張單上嘅買家收帳。

合資格嘅美國企業，可以向Facebook提交至少1,000美元的未付單據。如果被接納，小企業就會係幾日內收到匯款。呢啲細額單據對年收入差唔多860億美元嘅Facebook嚟講真係「小菜」一碟，但對於一啲小企業周轉嚟講，尤其係依家疫情期間，可以話係「救命草」喇！

Facebook小企業副總裁Rich Rao就話，係上年疫情最嚴峻嘅時候，就聽到好多小企業客戶講周轉有困難，所以當時就試行咗呢個計劃，結果都幾成功！所以依家希望擴展計劃，估計可以幫到大約3萬間小企業。