絲絲講場：高盛告別在家工作 兼取消免費餐

根據流傳出嚟嘅一份高盛內部備忘錄，由於英國「絕大多數員工」都接種咗疫苗，高盛已見到每日大約有一半嘅倫敦員工返到辦公室工作。備忘錄仲講到，公司鼓勵未有機會返到辦公室嘅員工同上司傾吓。嘩！好大壓力啫！

不過，高盛都話，將繼續遵守「戴罩令」，喺公共區域必須佩戴口罩，並且繼續實施強制檢測計劃。

最令絲絲煩惱晒頭嘅係，高盛宣布由9月20日起停止喺辦公室提供免費餐，話要「支持我們周圍重新開業嘅本地餐館」喎。不過，都可能收到「一舉兩得」之效嘅。

其實高盛不嬲都係「返工界先鋒」，6月時仲喺紐約總部提供現場音樂表演同美食車，鼓勵同事返公司。

返公司做嘢都好嘅，起碼啲辦公室空置率唔使咁高吖！事緣係Delta變種病毒肆虐，紐約市8月底有調查發現，僱主希望41%員工喺9月底前重返工作崗位，但呢個目標似乎冇乜可能實現。

調查顯示，紐約辦公室使率僅為22.3%。美國大城市中，以休斯敦、達拉斯同奧斯汀嘅辦公室空置率最低，但都係只有60%左右。而好多美國大型企業都相繼押後員工返辦公室嘅時間表，睇嚟紐約辦公室都仲有排「萬事大吉」。