絲絲講場：蓋茨171億買四季做酒店大亨?

講緊嘅就係前全球首富、微軟創始人蓋茨！佢旗下投資公司Cascade Investment宣布，將以現金22億美元（約171.6億港元），向另一位億萬富翁－沙特阿拉伯王子阿瓦里德（Alwaleed bin Talal），收購全球最豪酒店之一嘅四季酒店集團（Four Seasons Hotels and Resorts）控制權。

外媒就話，四季酒店估值係100億美元。呢筆全現金交易中，Cascade將收購沙特王子旗下所持47.5%股份嘅一半。另外，有一位知情人士透露，四季酒店集團大約有8.5億美元的債務。

蓋茨同沙特王子阿瓦里德都係啱啱踏入65歲嘅「生果金」之齡，兩人已經相識數十年。蓋茨早年更形容阿瓦里德係佢慈善工作嘅「重要夥伴」。

現時全球旅遊業大受疫情打擊，酒店就更加係重災區。雖然眼見疫苗愈來愈多人接種，旅行住宿慢慢復甦，但好似四季咁嘅豪華酒店，仲有排先可以恢復到疫前，而且復甦比中小型酒店慢。於是蓋茨今次就重注賭疫後奢侈旅遊復甦。

屈指一算，香港四季住一晚起步價3,000元，絲絲慳慳哋都負擔得起；而171.6億元收購四季23.75%股權，就要超級富豪先買得起喇！