絲絲講場：華科企死對頭又爆鍵盤戰

李亮喺社交平台轉載官媒文章「中紀委網站：資本介入是青少年沉迷網遊的重要因素，相關企業不能唯利是圖」，關鍵係分享文章嘅同時辣埋騰訊，話佢同某機構出台報告稱遊戲無害，受某中學老師批評，「就這一篇批評文章，騰訊就推動某地公安立案，刑詢這位反對遊戲毒害學生的中學老師，此案至今沒有結論」。

文尾仲話「資本對於公權力的影響與控制，可見當年是如何猖狂和肆無忌憚」。「資本」兩個字可圈可點呀，擺明針對中央依家最忌嘅「資本無序擴張」，可見佢用力之「精準」。

其實，騰訊上月已經宣布掟500億元人民幣出嚟響應中央嘅「共同富裕」。不過，李亮嘅鍵盤仍然唔放過企鵝仔，而且拉呢位老師都已經係3年前嘅事啦，就連內地網民都覺得李亮挖番出嚟「鞭屍」都幾莫名其妙。

不過，騰訊同字節跳動嘅牙齒印並唔係一朝一夕嘅事。今年6月，騰訊副總裁孫忠懷批評「低智短視頻像豬食（豬餿）」、「拉低用戶心智」。抖音方面出嚟還擊嘅正正就係前者提到嘅李君，炮轟騰訊自己大力發展短視頻同時，一直在攻擊短視頻行業。點都好，兩大科企話晒都威到出國際，以雙方都互不相讓嘅勢頭，真係唔知呢場口水戰幾時先完。企鵝仔又點回應呢？就係「不予置評」！

余絲韻