昔日東方絲絲講場：京東劉強東「淡出江湖」？
專心戰略設計鄉村振興
京東尋日宣布委任京東零售首席執行官（CEO）徐雷做「總裁」，負責集團各業務板塊日常營運同協同發展。雖則劉強東繼續係京東嘅董事會主席兼CEO，但講明佢會「把更多時間投入到長期戰略設計、年輕人才培養及鄉村振興事業」，其中「鄉村振興」正係大股東騰訊控股(00700)之前掟500億元人民幣搞「共同富裕」嘅其中一環，可圈可點。
自2018年以來，徐雷已經成為京東對外嘅「形象代言人」，多數公開場合、分析員會議都係由佢負責出席，後來仲成為京東零售CEO，掌管集團最核心業務命脈。而今次任命，相信亦都係進一步落實佢嘅「接班人」身份，名正言順地掌管京東集團嘅重要一步。
徐雷升職之後，佢原先個位就由京東健康(06618)CEO辛利軍頂上，京東健康CEO就由加入京東大家庭7年嘅金恩林出任。讀法文讀到碩士嘅金恩林現年41歲，有美國會計師牌，搞過嘅項目包括京東大藥房、藥京採、京東互聯網醫院等。
從大局嚟睇，劉強東「未退先休」，亦意味中國3大電商巨頭掌舵人都已經選擇交棒下一梯隊，唔知內地電商行業嘅格局會唔會有新變化呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
