絲絲講場：大摩吸新血 一個月兩度加新仔人工

外媒報道，華爾街大行摩根士丹利（大摩）喺一個月之內第二次提高初級銀行家嘅薪酬，希望喺搶奪新血嘅大戰中加大競爭籌碼。知情人士指，大摩將初級銀行家嘅每年基本工資提高到11萬美元，交易部門第一年入職嘅員工都有份加。

咪住先，大摩唔係上個月先加完人工咋咩？冇錯呀，大摩短短一個月前先將初級銀行家人工加到去10萬美元。唔止係摩根士丹利，花旗、德意志銀行、美國銀行同摩根大通都提高咗初級銀行家人工。

仲要連內地嘅企業都搶埋一份，總部位於北京嘅九坤投資，個名可能改得翹口，但唔好睇小佢，皆因呢家公司管理緊逾500億元人民幣資產，投資研究同技術團隊有九成以上係由內地知名學府或美國常春藤名校畢業。當然，要請呢班名校畢業生，錢就唔少得啦。外媒就話，九坤開出高達30萬美元年薪，由華爾街大行手上搶人才，高過大摩接近兩倍。

疫情推動之下，加上新興市場財富增長，全球金融行業嘅招聘格局有好大轉變。以往，呢班來自中國嘅尖子渴望去美國深造，然後獲得跨國公司一紙聘書跟手落戶埋美國，依家好多人都希望留番喺內地報效祖國。

不過，講到尾，呢一場華爾街嘅人才爭奪戰，最着數就梗係一班初出茅廬就成為搶手貨嘅銀行家啦。嗱，絲絲就支持「共同富裕」嘅，唔知道幾時先可以達成呢？

余絲韻