昔日東方絲絲講場：日網球天后受「狗狗」啟發打入「幣圈」
日本網球員大坂直美尋日成功闖入美國網球公開賽次圈賽事，實在可喜可賀！絲絲點解突然之間對網球員咁有興趣？事關有報道話，直美小姐除咗贏出首圈比賽之外，仲打入咗「幣圈」！佢近期搵緊投資機會，仲對虛擬貨幣愈來愈有興趣，望見又有名人對虛擬貨幣有興趣，絲絲梗係要睇多兩眼啦！
原來直美小姐認識虛擬貨幣嘅契機，係靠「開玩笑」起家嘅狗狗幣（Dogecoin）！佢喺訪問提到，留意到網民喺Twitter圍繞狗狗幣嘅討論，激發咗佢對虛擬貨幣嘅興趣，之後仲喺網上睇咗唔少關於狗狗幣嘅文章，最後連經理人都叫佢試吓投資虛擬貨幣添。
推NFT產品搵銀
大坂直美亦同NFT（Non-fungible Tokens，非同質化代幣）平台Autograph合作，推出NFT產品《Naomi Osaka Ruby Signed》，當中有唔同版本發售，由親筆簽名到網上私人對話都有。絲絲就覺得有少少借機博宣傳！
其實，早喺4月份嘅時候，大坂直美就同佢家姐麻里一齊推出NFT收藏品《The Colors of Naomi Osaka》。全套收藏品共6件，總售價接近60萬美元，其中一件更以高達20萬美元成交。
運動員嘅生涯又好短暫嘅，得23歲嘅直美部署吓投資，他日退役慢慢搣都係幾好嘅規劃嚟。之不過虛擬貨幣嘅波幅非常巨大，入場嘅話一定要諗清楚自己嘅承受能力，隨時一鋪清袋都無話唔可能。不過點都好啦，希望直美嘅投資同發球一樣一擊即中啦！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
