昔日東方絲絲講場：分析師吹大咗 公司焗開腔篤爆
日前中信建投機械行業分析師撰寫嘅深圳上市公司巨星科技業績預測報告吹太大，慘被公司董事會秘書當眾落面，直指「業績預測太激進了，公司做不到啊」，分析師只好面懵懵回應「知道了」就默默刪文。
估盈利3年升近倍
咁份報告到底有幾「激進」呢？中信建投就估，巨星科技2021年盈利按年增25.74%到16.98億元（人民幣‧下同），而2022至2023年則分別達21.64億元及26.69億元。
翻查資料，巨星科技2020年盈利都有13.5億元，按年升一半有多；今年上半年盈利就有7.28億元，都升咗15.26%。不過，按照中信建投嘅預測屈指一算，嘩！即係2023年盈利要比2020年升近一倍喎，咁又真係獅子開大口咗。
是咁的，向來唔少券商都會做「績前預測」，估吓間公司盈利、收入等，但公司通常都會化身做塘邊鶴，食吓花生唔出聲多，始終衝出嚟講盈利預測唔啱規矩嘛。不過當券商嘅預測同實際嘅成績有好大落差，就會反映喺股價上面，咁又難怪巨星科技董秘咁緊張，睇嚟牛真係唔可以亂吹。
余絲韻
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
