絲絲講場：UNIQLO大搵「女性科技」錢

所謂「女人錢最易賺」，UNIQLO就睇準女性生理期（生理喺日文解M）呢個龐大市場，推出「吸水衞生褲」，M到連衞生巾都唔使用，活動起嚟都爽啲，而所用嘅物料防水防滲漏兼抗菌除臭。由於可以重複洗滌再使用，係一種可持續物料，並非用完即棄，所以對女性身體和環境都非常友好。

事實上，UNIQLO同系嘅GU今年3月都推出咗類似產品嚟測試市場反應，日本傳媒更加話產品大獲好評、「連連售罄」，而且仲引入咗「Femtech」，即係女性科技（Female Technology）概念。根據美國一家研究公司嘅預測，女性科技市場規模，去到2025年將會達到5萬億日圓（約3,544億港元），潛力真係不容忽視。

作為女性，絲絲就梗係非常支持啦，開發新科技都係為咗人類生活過得舒適啲啫；而且UNIQLO未來都會送一批「吸水衞生褲」畀女性支援設施，實行貢獻社會。

不過，UNIQLO「吸水衞生褲」暫時只係日本限定，絲絲惟有等疫情過後通番關，先可以「返鄉下」大手入貨了。一條盛惠1,990日圓（約141港元），遲吓仲可能有高年班小學生用嘅尺寸添。