絲絲講場：萬洲上演《豬心風暴》 公司急澄清

邊個話「兩父子冇隔夜仇」？事緣萬洪建6月中嘅時候畀老竇「炒魷」，到上個禮拜，萬隆都辭任埋行政總裁，為二仔萬宏偉接任鋪路。大太子冇得做執董同副總裁之後，就轉做豬肉界KOL，間唔中上網講吓同老竇、細佬之間嘅恩怨情仇。

尋日終於出事啦，佢喺網上發表咗篇文章，劈頭第一句就話：「萬隆曾是我眼中神明一般的父親。」嘩！個「曾」字用得好妙喎。

另外，萬洪建似乎對爸爸做生意手法非常睇唔過眼，仲爆出今年2月尾發生咗「肥美」行為。梗係唔係講緊啲豬好肥美啦，而係萬隆同現任行政總裁郭麗軍大量進口美國豬肉六分體（即係將一隻豬切開6份），並且強行將進口結算價「嘜高」22.85%，令到雙匯損失多達8億元人民幣。「前太子」就指摘，呢個簡直就係「肥美損中」嘅行為！

仲未夠爆？萬洪建又指，2007年雙匯國企改制進入尾聲，有份參與嘅鼎暉公司私下無償授予萬隆5%雙匯股份，由於雙方無法或不願公開交易，於是呢5%股份就直接轉賣畀一間香港公司。

據佢所指，萬隆私下獲2億美元對價款項，之後將巨款存放喺一間香港嘅銀行，呢筆巨額收入冇申報，亦都冇納稅云云。

萬洲股價尋日就嚇跌11%，收市報5.95元。萬洲午市都出咗通告，話「注意到近期公司股票價格下降和成交量增加，也注意到若干媒體報道有關萬洪建（因不當行為而被免職的前董事）對集團提出的指控」。董事會仲透過通告澄清，該指控不真實且具有誤導性，保留向萬洪建等人採取法律行動嘅權利。

讀過吓中國歷史都知，「廢長立幼」都唔係好兆頭，睇嚟正喺萬洲身上就睇得到。事實上，由「廢太子」開始，萬洲股價已經跌咗接近16%。希望大股東快啲解決家庭紛爭啦，否則做佢小股東都幾閉翳！

余絲韻