昔日東方絲絲講場：萬洲太子爺出局 原來關阿爸事？
早前豬肉股萬洲國際(00288)以「對公司財物作出不當攻擊行為」為由，踢走「太子爺」萬洪建出董事局，惹來外界嘩然。事關現年52歲嘅萬洪建，係萬洲國際主席兼行政總裁萬隆之長子，一度被視為萬洲接班人。到底佢攻擊嘅係乜嘢「財物」，搞到要被踢走咁大件事？
傳討論高管任職遭罵 撞櫃洩憤
時隔一個月，內媒圈子就傳出當事人萬洪建喺社交平台發文交代呢個謎團，原來係因為討論「高管任職問題」而畀爹哋萬隆訓斥，萬洪建氣急之下以拳頭砸向靠牆房門，用頭撞擊玻璃櫃，宣洩心中怒氣。結果畀萬隆保鏢(禁)咗落地，萬洪建成頭血漬之餘，萬隆更要求影相取證。（咁損毀「公司財物」到底係指房門、玻璃櫃，定係阿仔個頭呢？）
話說萬隆有「豬肉界任正非」之稱，由肉廠小員工出身，今時今日做到中國最大嘅肉類食品集團。今次事件充分睇得出佢一貫做事風格，果然係「又快又狠」。
雖則報道冇提及兩父子因為討論邊位高管任職問題而發生爭執，不過自從上月底萬洲發出罷免萬洪建公告後，只見Dennis Pat Rick Organ辭任執行董事，剛剛星期四起生效。
不過，作為傳統「父子檔」企業，將「太子爺」踢出局之後，間公司點算好？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
