昔日東方滙豐加速轉型 員工由「身」做起
炎夏熱辣辣，我哋平日行街返工着住件T恤都滿頭大汗，難以想像一班銀行職員喺30幾度高溫之下，着住套西裝返工會有咩感受。不過，一眾銀行員工可能有好消息！最近滙豐喺內部電郵透露，唔使着制服嘅分行同事，可以由今個月開始改着商務便服返工，仲有一部分嘅分行職員會獲派發一件新設計嘅短袖制服。
據講，新制服先導計劃會係7、8月期間，喺幾間分行首先推行。件新制服就係一件紅噹噹嘅Polo Shirt，夠晒喜慶，順便襯番滙豐嘅主色系，左胸位就有個白色Logo。
試行期間，滙豐仲會收集埋客人同員工嘅意見，如果反應良好，目標9月喺全港全面推行。絲絲認為，銀行員工換咗短袖衫制服之後，分行嘅冷氣就唔使開到咁大，對環保嚟講都算係件好事！
滙控傳準備改變階級文化
事實上，近年虛擬銀行對傳統大型銀行步步進逼，大行除了加速服務數碼化應對外，仲要喺各方面迎戰，包括佢哋嘅衣着。虛擬銀行嘅大班同員工，好多時都係以商務便服示人，甚至就咁着件T恤外套，給人一種輕鬆、「貼地」嘅感覺。可能就因為咁，滙豐就順應潮流，容許員工試着輕便啲嘅衫返工。
滙豐今次從「身」出發嘅決心都好大，除咗換制服之外，據報母公司滙豐控股(00005)就話希望改變集團嘅階級文化，日前就通知管理層，要佢哋做好改革的準備，絲絲相信睇嚟唔使好耐，就會見到新形象。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
