昔日東方絲絲講場：摩通爭人才 新仔分析師年薪加到78萬
如今全球多地都講緊通脹重臨，咁通脹下又有冇贏家？除咗之前抽嘅通脹掛鈎債券（iBond）之外，原來水漲船高嘅，仲有一眾華爾街新仔嘅人工！
美國傳媒八到，摩根大通調高分析師首年年薪，由8.5萬美元增加到10萬美元（約78萬港元），由今日起生效。即係話，呢班千禧年前後出世嘅「小朋友」一出校門，就賺緊6位數美元嘅年薪。
據講摩通同時將分析師第二年人工，由9萬美元加到10.5萬美元，第三年就由9.5萬美元加到11萬美元。不過，摩通發言人就拒絕置評。
內地香港銀行家搶手
因乜事加咁多？皆因華爾街要同硅谷爭人才囉。硅谷有大把科技公司提供遙距工作等，工作更有彈性。所以摩通二話不說，就加人工同硅谷鬥過。薪酬顧問公司就話，加薪顯示美國金融企業穩健同勞動力市場吃緊。
金融公司去到各地搶人才，仲燒到日本最大券商野村證券，聽聞5月份出完獎金之後，野村喺亞洲流失咗大約20位初級投資銀行家。離職潮凸顯出內地同香港人才搶手，今年有部分公司嘅初級銀行家，離職率較舊年高出一倍。
野村中國負責人舊年就話，計劃今年將內地員工人數增加至約300人，主要係請銀行家和前台人員。
至於香港，滙豐銀行4月份亦都承諾，向投行新員工提供更理想的晉升階梯，3年後就有得升，而之前係要4年。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
