昔日東方絲絲講場：悉尼樓市已瘋了？冇廚廁都賣2822萬
澳洲樓市升幅強勁，單係悉尼喺今年3至5月嘅升幅就達9.3%，近33年最厲害。到底當地搶盤有幾勁？就等絲絲介紹個二手盤。
話說悉尼6公里外嘅肯辛頓（Kensington）一幢交吉二手屋，今個月頭就以470.5萬澳元（約2,822萬港元）沽出。間屋係4房戶，有接近6,000方呎咁大，距離悉尼市中心又近，聽落都唔錯喎。
業主揸15年賺逾兩倍
咁諗就錯晒嘞！事關地產代理Joe Recep透露，呢間屋冇水冇電，最過分係連廚房同廁所都欠奉！不過，作為一個稱職嘅地產代理，阿Joe都搵到間屋嘅優點，就係：「屋頂近期落完雨之後都冇漏水，代表間屋依然好穩陣。」真係唔該晒你喎！
有當地嘅搵樓網就形容呢間屋係「唔住得人嘅澳洲滄海遺珠」。講到明買咗係唔住得人，梗係啦，兩千萬港紙嘅樓，連廁所都冇。（註：間屋有花園有草坪）
以為冇人買？又錯嘞。拍賣有4位競標者出價，其中兩位希望重新裝修間屋，另外兩位就想砍掉重練，拆咗原本間屋再改建。
至於間屋點解搞成咁？阿Joe就話，原屋主喺2005年用110萬澳元（約660萬港元）買入，本來諗住計劃重建，但發現太大工程，所以丟低咗。即係持貨超過15年一直丟空，結果長情業主依然可帳賺2.27倍，真係「躺着也中獎」！
根據澳洲樓市分析師話，澳洲5月房屋成交率接近八成，係過去6年表現最好嘅5月，數據仲顯示投資者同上車人士參與度增加。所以話，「磚頭」嘅魅力真係難以抗拒。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
