昔日東方絲絲講場：耀才出6位數月薪招兵
話說我哋要聞就講到喺美國同南韓有人寧願全職炒虛擬貨幣，都唔去返工（相關新聞刊B1）。不過，華人始終比較踏實，唔返工會周身唔聚財！咁啱呢排香港同內地都有公司開始招聘計劃喎，而且兩間都係香港上市公司添。
本地券商耀才證券(01428)過去兩日舉行大型招聘日，包括前線及後勤等工作崗位。集團主席助理兼人力資源總監葉頴恩話，今時今日銀行同券商雖會透過人工智能科技設備回應客人查詢，但公司認為實體客戶服務能提升客戶安全感及信心，所以除咗不斷提升科技應用外，都會招攬前線人員，並認為依家係招聘人才嘅好時機。
請人有咩條件先？主要考慮應徵者是否具備勤奮好學的態度，以及對證券行業是否有熱誠。最重要嘅係，個別職位月薪更高達6位數字。
美團今年計劃請6萬人
心動？咪住！睇埋另一間先，同樣係數字6，美團(03690)就計劃今年新招聘6萬人，以滿足業務擴張需求咁話喎。至於做啲乜？主要係物流、地區推廣員等嘅基礎職位，負責社區團購業務「美團優選」，同埋B2B （企業對企業）餐飲供應鏈業務「快驢」。
睇返美團上年年報，原來截至上年年底，成間公司只得6.92萬人。內媒引述美團估計，今年會自然流失兩萬人左右，亦即係出年公司預計會擴張到11萬名員工。
絲絲冇比較意思，畢竟疫情後，有公司搞大型招聘，搵工人士多咗出路係好事！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
