昔日東方絲絲講場：騰訊豬餿論激嬲字節跳動
「現在短視頻平台的個性推薦實在太強大了，你喜歡『豬食』（豬餿），看到的就全是『豬食』，沒有別的。」講出呢句咁霸氣嘅對白，就係騰訊控股(00700)副總裁孫忠懷（圖），呢位仁兄正正係唔少熱播連續劇嘅製片人，包括《燕雲台》同埋《致我們單純的小美好》。
斥低俗短視頻影響心智
孫生仲話，部分低智低俗短視頻內容長期影響用戶心智，消耗用戶大量時間，拉低國民審美標準……又話短視頻內容有共同特點，係簡單洗腦式重複，對好多心智未成熟青少年造成不良影響。佢仲見到好多人喺公共場所，「像傻子一樣」睇洗腦短視頻。
呢位孫忠懷出品過咁多大熱劇集，講句嘢自然就有咁上下分量啦。果然一石激起千層浪，呀，唔係，係一個浪先啱。事關內地嘅短視頻企業何其咁多，但反應最激動嘅就只係得抖音母企字節跳動。
字節跳動副總裁李亮喺社交網站隔空回應，話呢位高管（孫忠懷）可能唔知，號稱已經擁有幾億用戶嘅微信視頻號係目前唯一一家冇按要求上線「未成年模式」的短視頻平台，而且自己就喺度大力發展短視頻。
微信封禁抖音 早已積怨
佢又冇錯噃！事關騰訊首季業績白紙黑字寫到明「正在加大在短視頻等領域的投資」，仲講到會「優化以社交為導向的推薦算法，豐富知識型內容」。日資行大和之前同騰訊管理層傾偈，對方話佢嘅短視頻定位傾向資訊同教育，而中國短視頻用戶需求最終會多樣化，又預計出年開始會畀用戶落廣告，實行賺多筆。
字節跳動睇嚟真係嬲到跳舞，事關李亮發文無幾耐仲專登喺騰訊嘅微信公眾號公布2018至2021年畀騰訊屏蔽嘅案例，鬧爆騰訊對字節跳動旗下抖音、火山小視頻、西瓜視頻封禁持續3年，波及逾10億用戶。直到宜家，由於被微信封禁，每日有逾4,900萬人次分享抖音至微信或QQ時受阻。
「企鵝仔」好少咁串，但弔詭之處在於孫生冇點名邊間企業！不過，字節跳動同騰訊不嬲多牙齒印係人都知，大家應該仲記得，抖音年頭告過騰訊限制微信等用戶分享抖音內容係「濫用市場支配地位」，雙方展開過一場罵戰。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
