Market Insight:水泥股汰弱留強
隔晚耶倫獲美國參議院確認擔任第十五任聯儲局主席,亦係聯儲局百年歷史上第一位chairwoman。美國去年十一月工廠訂單升1.8%,好過市場預期,不過十二月ISM非製造業指數意外回落,令市場對聯儲局維持低息之預期。十年期美債息收2.96厘,華爾街三大指數偏軟,跌幅介乎0.25至0.44%,未脫大漲小回格局。
睇見中港兩地股市指數認真唔開胃,人仔拆息落番晒一樣唔掂。滬綜指跌至去年八月低位2,029點先勉強見技術反彈,最後升得1點收2,047點。
「克強經濟學」對經濟增長放緩的容忍度,睇落去愈來愈高,加上今年內地逐步實現利率市場化,加上叫停長達一年半的IPO市場重啟,一句唔該被國際投資者作為中字派「長空萬里」的藉口,連大鱷索羅斯亦出口術,預言一四年環球經濟不明朗,他擔心來自中國而非歐洲。
芬佬吼實A股準新丁
到底IPO重啟有幾大影響?今年預計有超過300間A股公司排隊上市,單是一月份就有超過50間,粗略估計全年有5,000億至1萬億人仔被公仔紙吸走,等於每星期96億至192億人仔,都真係唔講得笑。但有迹象見到券商為省靚招牌,一月打頭陣的一批伸手黨質素普遍較佳,吸引到唔少基金換貨,估計同近期A股弱到離晒譜有關。
魚缸愈趨兩極化,幾倍PE國企無人吼,幾十倍PE博彩及中國新經濟概念股驚死買唔切,最弊短期睇唔到逆轉的催化劑,網絡、環保、新能源、醫藥股,或者部分保守投資者會覺得貴到開始要警惕,但現實世界無人有預知未來水晶球,否則個個都識得3.7元買騰訊(00700)坐到五百蚊發晒達!
由於股市高度集中在新經濟股,好難評論依家係泡沫邊個一階段,怕輸又更怕執輸,古勝認為,較合理做法係做好賺頭蝕尾心理準備,入市前訂好一成至一成半,一個可以承受損失的止蝕位,同佢死過,炒到成個故事無戲唱為止。
基本因素有所好轉
中建材過去幾年的擴張步伐過急,三年複合產能年增長近三成,遇上冷鋒,公司已調整策略,今年起以改善毛利率及資產負債表為先,今明兩年資本開支會由去年高峰260億人仔,回落至每年90億至100億人仔。
近期水泥價格有見底企穩迹象,估計春節後季節性需求回升,水泥價看漲。一四年PE得5倍,同內銀唔同,論基本因素,水泥股最壞時刻已過,有冇燒鵝味道見仁見智,但肯定係蔗渣價錢,近期一跌已經將去年十一月中升幅消化八成,諗得過。
今年4G手機市場將成為各智能手機製造商角力的主場,周一中國無線(02369)受今年目標出貨量相關的消息刺激,股價急升,昨日回吐。畢竟智能手機銷量增加,不等於企業利潤就會同步增加,特別是如今市場競爭白熱化,製造商毛利率受擠壓。
TCL通訊策略奏效
昨日收市後,TCL通訊(02618)宣布上月手機及其他產品總銷售量按年升五成,其中海外市場的手機及其他產品銷售量按年增幅更達到61%,內地銷量則按年下跌17%。內銷數量同比下跌不一定係壞事,反而外銷業務持續增長,顯示走出去分散風險的策略收效,可藉此分散市場風險,避免跟本土同業惡性競爭,相信今年其股價表現可繼續跑贏同類股。
古勝
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500