戴祖儀越南吸金 忙到發燒

無綫小花戴祖儀唱歌、演戲樣樣掂，加上外表甜美，獲得不少工作機會。近日她與黎諾懿獲邀到越南出席活動，一到埗即興奮換上貼身裙來個Room Tour，大晒香肩之餘，還騷出深長事業線，相當煞食！之後她在活動上大展歌喉，更專登學了《越難越愛》越南版，她接受本報訪問時說：「我揀《越難越愛》，係因為知道越南嗰邊好鍾意睇港劇，同埋首歌真係好紅，咁啱首歌真係有越南版本，所以的起心肝背咗一半越南文歌詞，而另一半就唱廣東話，所以唔係背咗好耐，2、3日就背好。」